नारळाच्या पोळ्या

साहित्य :- 

• दिड कप ताजा खवलेला नारळ 
• पाऊण कप किसलेला गुळ 
• १/२ चमचे वेलचीपूड 
• १/४ कप गव्हाचे पीठ 
• १/४ कप मैदा 
• चिमुटभर मीठ 
• २ चमचे तेल 
• २ चमचे तूप. 

कृती :- 

• नारळ आणि गूळ एकत्र करून मध्यम आचेवर घट्टसर होईस्तोवर (साधारण १० ते १५ मिनिटे) ढवळावे, वेलचीपूड घालावी. गार झाले कि बंद डब्यात ठेवून २ ते ३ तास फ्रीजमध्ये ठेवावे 
• मैदा आणि गव्हाचे पीठ एकत्र करावे. २ चमचे कडकडीत गरम तेलाचे मोहन घालावे. १ चिमुटभर मीठ घालून ढवळावे. पाणी घालून घट्टसर मळून घ्यावे. १/२ तास झाकून ठेवावे. 
• नारळाच्या मिश्रणाचे दीड इंचाचे गोळे करावे. साधारण ५ ते ६ गोळे होतील. तेवढेच भिजवलेल्या कणकेचे गोळे करावे. 
• कणकेच्या लाटीची पुरी लाटावी. मधे नारळाचा गोळा ठेवून पुरीच्या सर्व बाजू एकत्र आणून बंद करावे. थोडा मैदा भुरभुरवून पोळी लाटावी. 
• तवा गरम करून तुपावर खरपूस भाजून घ्याव्यात. गॅॅस मध्यम ठेवावा. 
• जरा कोमट झाल्या कि खाव्यात. गार झाल्यावरही छान लागतात तसेच ३-४ दिवस टिकतात.