अशी बनवा दुधीची सुकी भाजी सगळे आवडीने खातील

 

साहित्य :- 

• अर्धा किलो दुधी (कोवळा पाहून घ्यावा, जून असेल तर शिजायला वेळ लागतो आणि खूप बिया असतात.) 
• एम मध्यम मोठा बटाटा (भाजी जरा मिळून येण्या करिता) 
• तिखटपणानुसार हिरवी मिरची ( कमी घेतली तरी चालेल पण वगळू नका ) 
• कढिलिंबाची १०/१२ ताजी हिरवीगार पाने 
• आवडत असेल तर थोडं लाल तिखट 
• मोहोरी आणि जिरं पाव-पाव चमचा
•  मीठ 
• हळद
• थोडी साखर 
• एम-टी-आर ची सांबार पावडर (कुठल्याही ब्रेडचा सांबार मसालाही चालेल ) 
• बारीक चिरलेली कोथिंबीर, वरून घालण्याकरिता. 

कृती :- 

• दुधी आणि बटाटा सोलून बाईट- साईज च्या चौकोनी फोडी करून घ्यावा. 
• तिखटपणानुसार हिरवी मिरची मोडून किंवा बारीक चिरून घ्यावी. 
• लोखंडी कढई तापत ठेवावी आणि जरासं तेल घालावं. 
• यात क्रमानी मोहोरी ; तडतडली कि जिरं ; ते जरा फुलल कि हिरवी मिरची आणि कढीपत्त्याची पानं घालावी ; यावर हळद घालून चिरलेली भाजी घालावी आणि व्यवस्थित परतून घ्यावं. 
• तेल मसाला नीट माखला भाजीला की वर झाकण घालून अगदी मंद आचेवर एक वाफ येऊ द्यावी. 
• नंतर मीठ, साखर आणि वापरणार असाल तर लाल तिखट घालून परतून भाजी पूर्ण शिजवावी. 
• सर्वात शेवटी मोठा चमचाभर सांबार पावडर घालून नीट हलवून आच बंद करून टाकावी आणि झाकण घालून भाजी मुरु द्यावी १० मिनिट तरी. 
• मस्त लाल रंग आलेली तरीही मधून मधून दुधीच्या हिरव्या फोडी दिसणारी भाजी तयार !

        वरून कोथिंबीर घालून सजवावी आणि वाढून घेऊन तूप लावलेल्या फुलक्यां बरोबर चापावी.