चमचमीत व एकदम मऊ असा दही वडा

                                                                      * दही वडा *

वाड्यांसाठी साहित्य :- 

१) पाउण कप उडदाची डाळ 

२) १/४ कप ओल्या खोबऱ्याचे पातळ तुकडे 

३) ४-५ मिरी 

४) चवीपुरते मीठ 

५) २ कप पातळ ताक 

६) तळण्यासाठी तेल 

...दही बनवण्यासाठी.... १) दीड कप दही, २) ५-६ चमचे साखर, १ चमचा मीठ.

....वरून भुरभूरवण्यासाठी.... १) मिरपूड, २) लाल तिखट, ३) चाट मसाला. 

कृती :- 

१) उडीद डाळ पाण्यात ४-५ तास भिजत घालावी. पाणी काढून टाकावे. अगदी थोडेसेच पाणी घालून मिक्सरमध्ये बारीक वाटून घ्यावी. वाटलेले मिश्रण आपल्याला दाटसरच हवे आहे. इडलीच्या पिठापेक्षाही घट्ट असावे. वाटलेले मिश्रण हाताने किंवा हँँन्ड मिक्सरने फेटावे ज्यामुळे मिश्रणात हवेचे लहान बुडबुडे तयार होतात आणि वडे हलके व्हायला मदत होते. त्यानंतर त्यात मीठ, ठेचलेली मिरी आणि खोबऱ्याचे पातळ काप घालावेत. 

२) वडे मध्यम आचेवर गोल आकारात किंवा मेंदुवड्याच्या आकारात तळून घ्यावे. वड्यांचा आकार खूप मोठा ठेवू नये. काही वेळेस वडे आतून कच्चे राहू शकतात. 

३) पातळ ताकात थोडी साखर आणि किंचीत मीठ घालावे. यामध्ये तळलेले वडे साधारण अर्धा ते एक तास बुडवून ठेवावे. 

४) तोवर वरून घालायचे दही तयार करून घ्यावे. वाडग्यात दही घ्यावे, रवीने नुसतेच घुसळून घ्यावे. मग किंचीत पाणी घालून आवश्यक तेवढा पातळपणा द्यावा. त्यात चवीनुसार साखर आणि मीठ घालावे. ढवळून घ्यावे आणि थोडावेळ फ्रीजमध्ये गार करण्यास ठेवावे. 

५) सर्व्ह करताना ताकात भिजवलेले वडे प्लेटमध्ये घालावेत, त्यावर दही घालून वरती चाट मसाला, मिरपूड आणि लाल तिखट घालावे. 

          खाण्यासाठी तयार आहेत दही वडे एकदम स्वादिष्ट आणि खायला ही मस्त दही वडे.